上次去尖沙咀想去呢間店買包，點個見到執左，真係有Ｄ傷心，畢竟我係呢到食過多款包都覺得好食，冇食一排就會有Ｄ掛住，好彩上網見到港島區仲有分店，呢日去開灣仔點都要來試下新包先得！！
呢到嘅迷你包Size絕對統一咁迷你，當然唔抵食架喇，但係好處係可以試吓好唔好食，覺得好食下次就可以買個正常Size，都好嘅。
香草迷你橄欖意式包 ($12)
細細個包已經有青橄欖同黑橄欖係面，橄欖有咸香，好食；意式包裡面煙靱豐香草味，好食。
- Nov 17 Tue 2015 18:00
食多幾款《Maison Eric Kayser》麵包
- Nov 10 Tue 2015 18:00
又來多食幾款新野《Starbucks》
新地市終於開返間新店，雖然要行到去HomeSquare，不過總好過冇，呢間地方夠大，空間感又大，最適合夜晚來hea吓，日間太多人就免喇。
野莓朱古力麵包布丁 Raspberry Chocolate Bread Pudding ($29)
面層有燕麥脆、朱古力粒同野莓，野莓反而比其他材料少，朱古力燕麥脆翻烤過好香脆好食；呢個麵包布丁比之前推出嘅質地乾身，只有底層有奶蛋，不過好甜，濕潤些好Ｄ，今回呢個一般喇..。
- Nov 03 Tue 2015 18:00
久違了的扒房《第尾牛扒》
我都唔知有幾多年冇去扒房喇，呢晚老友話想鋸扒，話呢間好食唔使等咁就去啦，點知要係樓梯排隊，如果要坐卡位就要等耐Ｄ，我地４個人唔揀卡位會坐得鬆動Ｄ，所以今次等左２０分鐘已經覺得快喇。
入到去，佢地係熟客仔已經極速諗到要乜野餐，我就要等到佢地點哂餐上到枱先諗到食乜，我真係有選擇困難症架哩！！
呢晚我地４個點左以下食品：
① 晚餐F：鐵板肉眼牛扒配黑椒汁、鮮油餐包、羅宋湯、凍檸茶 (84)
② 晚餐G：鐵板西冷牛扒配黑椒汁、鮮油餐包、羅宋湯、凍檸茶 (84)
③ 雞絲湯米粉 ($42) + 鮮油餐包、羅宋湯、熱咖啡 ($24)
④ 晚餐A：鐵板牛仔扒配蒜茸汁、鮮油餐包、羅宋湯、凍檸茶 (72)
Total = $306
10% Service Charge Total = $336
- Oct 27 Tue 2015 16:26
真係好濃郁《御前上茶-手作抹茶專賣店》
呢日順路想行吓誠品，當到４點時有廣播話有100枝雪糕派發，叫有興趣嘅可以去拎，我地本身係３樓，本來都冇諗住去食，不過到1610落到２樓，見好似未派哂，咪即管去拎張No.囉，點知到我地已經係第98, 99位喇，真係緊緊有得食，雖然我唔鍾意食雪糕，不過係我最愛嘅抹茶，一枝都要$32，我呢ＤCheap精緊係要試吓啦~ 唔試就笨！
抹茶霜淇淋•筒 ($32)
抹茶味好濃，抹茶本身嘅啖啖苦味啱啱好，甜筒厚身而且好脆，好味，雖然細枝，不過覺得已經比坊間日本果Ｄ平。
焙茶霜淇淋•筒 ($32)
第一次食焙茶味雪糕，呢個焙茶味同抹茶同樣咁濃，唔甜且有茶嘅苦味，雪糕又滑，好味！！
不過唔知點解相同嘅價錢，焙茶呢款比抹茶細小嘅呢？
- Oct 20 Tue 2015 18:09
《東海堂》５款小甜品
蜜瓜の漩渦 (蜜瓜卷) (Melon roll cake) ($18)
綠色的海綿蛋糕好鬆軟，以為會好有蜜瓜味，原來係冇蜜瓜味嘅，有少少失望；中間卷住厚厚忌廉好滑，再加埋蜜瓜果肉粒，好清甜！
- Oct 13 Tue 2015 16:01
湯湯生日小Party 2015
10月3日，呢日我地為湯湯提早一日慶生，我1420到達，上到去已經差唔多齊人喇，我地整吓汽球佈置一吓，到1440湯湯就來到喇，連湯湯，我地今次共有１５人！
湯湯來到，我地始通知下面話可以攞野食上來，連埋我地點的到會，共有９款食物、１款甜品、２汽水、１菊花茶及橙汁；通常我去到邊都冇乜野係啱食架喇，呢次我都有食到幾顆西蘭花、幾粒車厘茄同２件芒果布甸。
每位都好努力食食食，相信真係等呢餐晏左嘅Lunch，食到咁上吓又停下，當時仲有好多食淨，不過過一段時間又有Fans食吓，最後都唔算淨好多野，咁都好Ｄ。
到1515，全部人都坐係到，我就因為我老友唔得閒，所以我呢Ｄ內向嘅人，都好少出聲也冇搵人傾偈，企係另一邊影相，湯湯就突然嗌我個名話：「做乜咁耐都聽唔到妳把聲架？」我咪答我怕羞嘛 :p
之後又問我去左西安玩，Ｄ兵馬俑係咪好遠等等，只要一兩句同妳對話足以令我開心好耐，可以為妳慶生真的覺得好幸福。
到1515開始到切蛋糕吹蠟燭環節，見到我地個個都係咁影相，果然係最熱鬧嘅時刻，見妳３個蛋糕都許願，必定會成真嘅！
臨到尾聲，我老友終於來到了，當然係散水前捉湯湯同老友selfie一張相先啦，最後到18點正就散喇。
- Oct 06 Tue 2015 14:47
Classic drinksmade brand-new@Starbucks
全新推出的雙重黑白朱古力咖啡與載譽回歸的法式雲呢拿鮮奶咖啡將為大家的經典最愛帶來另一番風味!
The all-new Dark & White Cocoa Mocha and French Vanilla Latte will amaze you with some surprising twists of your classic favorites!
雙重黑白朱古力咖啡 Dark & White Cocoa Mocha（中杯售價$40，大杯$43、特大$46）
黑朱古力的甘濃風味與白朱古力的細膩甜香完美融和，加入醇厚的星巴克特濃咖啡和新鮮蒸煮的牛奶後，於表面覆上細滑的朱古力忌廉、朱古力醬並灑上可可粉作結，每一口都是極致的朱古力享受，洋溢甜蜜的初秋暖意。
法式雲呢拿鮮奶咖啡 French Vanilla Latte（中杯售價$40，大杯$43、特大$46）
來自星巴克經典飲品雲呢拿鮮奶咖啡的華麗變奏–法式雲呢拿鮮奶咖啡以新鮮蒸煮的牛奶及帶烘烤風味的特濃咖啡作基底，加入法式雲呢拿醬調配，優雅展現真正雲呢拿原豆獨有的香甜濃郁。覆在頂層的鮮忌廉更灑滿雲呢拿籽及朱古力醬，讓你盡情享受當中的柔滑滋味!
- Sep 29 Tue 2015 11:06
多士好咗Ｄ，其他平返Ｄ就好@Starbucks
雞肉凱撒沙律 Chicken Caesar Salad ($42)
先看看相片裡的成份就知有什麼材料啦~ 盒沙律睇落好大盒，但其實份量唔算多，略嫌貴了點；
打開只有數片雞肉，算幾嫩滑；車厘茄得２粒，雜菜都幾新鮮，尤其羽衣甘藍最好食，最慘係麵包粒腍哂又冇味！
蜂蜜脆糖朱古力咖啡星冰樂 Honeycomb Crunch Mocha Frappuccino® blended beverage (G$44)
朱古力味濃好甜冇哂咖啡味，頂層有粒粒蜂蜜脆脆，真係幾脆仲好甜添，飲完好膩！
- Sep 22 Tue 2015 15:14
第２次來唻《Captain糖》
記得第一次唻係同幾個老友食完飯後想食甜品，行下行下而揀到呢間嘅，其實主因為想去果Ｄ都大排長龍，好彩行到過來呢到啱啱有張６人位坐，如果唔係都冇得食。
今次就係睇完戲想搵Ｄ野食，所以10點就來到，又係啱啱好有張枱有位，去啦。
我本身係鍾意食涼粉嘅，其實記憶中上次來食好似一般，今次來真係唔記得左好唔好食喇，不過都係揀返普通甜品吧！
呢晚我地２個就揀左：
① 日本抹茶雪花冰 ($47)
② 紅豆黑涼粉 ($27)
Total = $74
- Sep 15 Tue 2015 12:35
陪老友來《Mr. Potato Head Cafe》
呢間薯蛋頭Cafe係2015年7月4日正式開幕，仲要一開就係屯門同尖沙咀２間店，講真呢，我就唔係鍾意呢隻野嘅，仲覺得怪怪地添，開頭都以為係香港開Cafe有冇人幫襯架？全球首間薯蛋頭Café喎，但鋪租咁貴捱到嗎！？
哈~ 又真係估佢唔到的確有好多Fans喎，係薯蛋頭Cafe隔離黐住Beard papa's嘅。
呢晚我就陪老友唻啦，搭正６點來到，本來我係知要等位寧願唔食嘅人，不過見老友好想食，我先陪佢等吓啦，好彩我地早一步係門口等，真係遲一分鐘人龍都差好遠喇。
我地咁早去到都要等20分鐘先有位，入到去原來地方都唔算好大，位與位之間都幾窄吓。
坐定定，望望下，原來有幾款不同嘅薯蛋頭毛公仔供抱抱影相喎，老友當然唔會放過呢個機會啦，我雖然唔鍾意佢都要循例影吓相，到此一遊咁~ 哈哈！
見到menu只係一張紙，食物連飲品甜品同在一版裡，睇落真係冇乜野揀咁噃，我一睇就只有熱香餅啱食，老友最後都揀左漢堡食。
其實呢，以呢種卡通噱頭來做生意，食完呢餐，如果唔係老友請，真係唔會來食，一來價格略高外，份量又少，味道又只屬普通，沒有特別好與唔好，可以捱得住嗎？
- Sep 08 Tue 2015 12:02
都算係用心製作の《石仔記粥麵》
近２年好多時周日行經呢到，見到呢間店感覺係開左好多年嘅，可能望入去隔局似啦，周邊店鋪又咁舊式，所以有呢個錯覺，不過上佢面書睇，方發覺係2013年先開業，又真係估佢唔到。
一踏入店裡，對住門口有２人位，我地就坐落去，另外的都係長枱４人以上嘅位，都係全用上木枱木櫈，加埋店裡裝修，感覺就更老店。
餐牌方面都好多款式，除了有是日飯餐外，更有石仔自選粥餐／麵餐，都係粥／麵+小食+飲品，睇下圖中餐牌就知都有多款野可揀嘅。
本來我都想揀個粥餐食，點知只有豬紅魚片粥我係食嘅，但我又唔食魚片呢，最後都係放棄啦，最後我地揀左以下野食：
① 自選粥餐：杞子滑雞粥+京醬豬紅+熱檸茶 ($52)
① 自選粥餐：杞子滑雞粥+京醬豬紅+熱檸茶 ($52)
② 生滾豬肚粥 ($28)
③ 油炸鬼一條 ($10)
Total= $90
- Sep 01 Tue 2015 12:32
似Cafeの《MiSS‧Mixian Sour Spicy 米線專門店》
記得係農曆年時係尖咀行過去旺角途中見到有間店裝修緊，當時已經見到門面以湖水綠為主，感覺好Cafe幾西餐添，之後隔左一個多月再行經此地見到係一間米線店，我都呆一呆，吓！？
完全唔似食米線喎，除左因為門面似Cafe外，周圍已經咁多間食米線嘅店，係呢到又開一間，係外面見到餐牌又唔係特別貴，以呢區鋪租唻講，捱到嗎！？
隔左幾個月再行經，咿~~ 呢間野仲捱喎，相信食物應該都唔差啩？
咁啱又係店外更見到有我最愛嘅蕃茄湯底，即時好感興趣一試，適逢呢晚有戲睇，一於試下喇！
呢晚我地７點來到，已經差不多滿座，好彩我地早一步到，有枱坐，唔係就要坐吧枱，不過見到吧枱有USB充電座供叉電，太貼心了吧，仲要係面壁而座，早知就遲一步揀坐吧枱啦。播住純音樂，環境都幾唔錯，不過枱與枱之間都幾迫，空間感唔太夠。
Menu好簡單只有４版，不過都要睇清楚，因為有４款湯底加不同配料不同價錢，總之每種湯底都附一款配料，如果唔加配料就一個價喇，其實同其他米線店一樣。
- Aug 25 Tue 2015 17:10
到Megabox食個印度快餐《Royal Paisley》
呢晚因為去APM睇戲，不過APM冇乜野啱食，就約佢去德福睇吓有乜好食，遊下諗下之際記得有次行上Megabox有間食印度快餐嘅，都想試下跍，就係咁就行咗過去喇，要上到10樓，第一次來Megabox food court，睇環境我就搵咗個對住溜冰場位坐低喇。
我最鍾意就係食卡巴卷，當然唔使諗就揀到啦，佢都諗咗一陣先諗到食乜，最後係1950終於落單，其實係外面都可以好清楚睇到裡面煮食環境，不過呢個food court唔係用電子牌，買完要係附近等嗌No.，我就見到有幾個人都聽漏咗喇。
雖然每樣野食都要等下，不過係即叫即製嘅話都接受吖，只係要杯熱咖啡要等到最後先出咯~
20:11開得餐，以下係我地點的：
① Set R7: 蔬菜蕃茄咖哩飯 配凍檸檬伯爵紅茶 ($42)
② Set K8: 蔬菜沙律卡巴卷 配熱咖啡 ($36)
③ M1: 印度咖哩薯條配蕃茄馬沙拉咖哩 ($18)
Total $ 96
- Aug 18 Tue 2015 16:04
同湯湯去《泰簡單》飯聚
呢晚因為lift壞了，根行樓梯上到頂層，我地準時1930到達，以有３位Fans到了，今次一行９人，等到湯湯2020終於來了！
佢一來即時坐下問叫左野食未？又話好肚餓，坐左係我前面實在太好喇！！！
點好哂野食後就慢慢同湯湯傾偈啦，食下偈下，食到咁上下，係靜左落來時佢突然叫我個名問我最近有冇去飲咖啡....又拿鐵又剩，好搞笑；又傾下最近嘅演唱會，又問佢之後工作係點等等，睇佢笑得咁開懷真係好開心，呢晚更係素顔來添，如果唔係當朋友聚會又點會咁素顔呢？
食到最後，湯湯問食唔食甜品，佢想食西米糕喎，因為我地好多人都唔食，所以夾埋只點４件，個職員落單時仲用手指話我地知糕點的大小，仲話得４隻叉，嘩~~呢Ｄ係乜野態度呀！
食到2220，足足傾左２個鐘，今回由我地請湯湯，無理由次次都係佢請嘛，埋單後就直接走了，冇地方比我地影合照，不過都唔打緊，因為佢坐係我前面已經比我睇左成晚，好開心！
- Aug 11 Tue 2015 14:33
２羊生日小菜飯《稻香》
一年每逢到呢個日子都係同時為２個朋友慶生，年年都唔知食乜，呢次就因為有晚經過呢到見到有間稻香，睇落去環境都幾唔錯喎，所以我就提議來打邊爐啦。
結果就真係來了，朋友先去等位，原來有分打邊爐同小菜的，咁兩邊都等啦，叫到邊到有位咪食咩囉，結果小菜位好快就有位喇，不過經過今次叫小菜，人手不足的情況下，上菜都幾慢，就算先點了的雞腳同粉皮竟然要等２０分鐘先有得食，好彩我地呢晚有大把時間，慢都冇所謂啫。
原來我地呢個組合係第一次係酒樓叫小菜食，往時都係打邊爐嘅，聽朋友講稻香各分店的質素都唔同，有Ｄ好難食喎，好彩今次我地呢個第一次都幾好食，仲幾抵食添，唔錯吖！
六人叫左以下食物：
① 沙薑雞腳
② 胡麻雞絲粉皮 ($32)
③ 鐵鍋瑞士醬油雞 (平日半價) ($34)
④ 脆皮咕嚕肉
- Aug 04 Tue 2015 09:23
Explore Layers of Crunchy and Creamy 夏日樂「脆」此中尋
在全新蜂蜜脆糖朱古力咖啡星冰樂®及蜂蜜脆糖香橙星冰樂®中尋找意想不到的夏日樂「脆」!
Explore the creamy, crunchy goodness on your first trial of our Mocha Honeycomb Crunch Frappuccino® and Orange Honeycomb Crunch Frappuccino® blended beverages!
蜂蜜脆糖香橙星冰樂® (HK$41/中、HK$44/大、HK$47/特大)
Orange Honeycomb Crunch Frappuccino® blended beverage
於冰涼細滑的香橙星冰樂®表面加上蜂蜜脆糖、鮮忌廉和風味酸甜獨特的香橙果醬，細啜一口，馥郁迷人的果香氣息於味蕾中燦爛綻放，定能為每一個陽光充沛的夏日注入朝氣。
蜂蜜脆糖朱古力咖啡星冰樂® (HK$41/中、HK$44/大、HK$47/特大)
Honeycomb Crunch Mocha Frappuccino® blended beverage
- Jul 28 Tue 2015 11:54
同佢來《Brick Lane Gallery》食生日飯
又一年同佢過生日，每逢到呢個日子要諗買乜禮物要痕外，揀去邊到食都同樣頭痕，係揀呢間前有想過去姆明餐廳同尖咀Jamie's Italian嘅，點知早大半個月去Book位都full左，而姆明餐廳又怕冇乜野啱食，直到一晚行經棉登徑果頭，我倆行行吓見到呢間Brick Lane Gallery裝璜幾靚仔，好似都ＯＫ喎，說走入去Book位喇，又比我地Book到，所以就來啦。
book位時店員講明只會Hold枱10分鐘，過時說自理啦。
所以我地呢晚極準時地1930點入去攞位，但我地一坐下即感到心知不妙，雖然環境燈光幾好，可是覺得很嘈，唔係內裡的音樂聲(其實都唔多覺有音樂)，而係食客嘅說話聲，唔明點解會好似酒樓....Ｄ聲焗住哂咁，我地想傾吓偈都費事，因為怕好似鬧咬咁大聲先傾到偈。
我地坐下諗食乜都諗左15分鐘，最後揀左３款野食同飲品，雖然呢到有款甜品好出名，不過唔係我地杯茶所以冇叫，我都知係餐廳食叫飲品係唔抵，不過都覺得價錢偏高；另外食物方面唔係唔好，但如果同其他我地食過的食店來對比，就真係唔夠好，價錢同品質唔太成正比。
不過值得讚嘅係店員服務態度幾好，見你杯中冇水會過來倒水，食完一款食物又會來換碟，當然我地唔比較環保，所以都話唔使換喇。
同埋我有發覺店員會留意食客進食的進度，唔會一次過將食品上枱的，因為我見店員會望我地食到差唔多最後，聽到佢叫裡面話沙律上得，冇幾耐我地的沙律就來了，我唔知係為食客著想還是枱太細而續款食物上枱，不過我就覺得呢方面做得幾好。
- Jul 21 Tue 2015 18:14
再度同湯湯去《樂天皇朝》飯聚
再來了再來了！
估唔到今次只相隔半年就可以再同湯湯飯聚，叫我地諗食乜，但各人都好似搵唔到間啱心水嘅，結果呢.....咪去返上次聚會果到《樂天皇朝》囉！
呢晚我地約好８點準時到齊，湯湯來到已經2040了，不過見佢好似好趕咁嘅？
佢坐左係我隔離，好耐都冇咁近距離，好開心但又好害羞呢...佢一同我講野我就驚驚地，係小Fans心態，就算幾熟都好始終係Fans，仍會有怕羞冒汗嘅 。
因為我要全紀錄聚會食過Ｄ乜，所以全程都掛上相機係頸，係食到一半時，湯湯突然望住我坐埋來問係咪影相啫？搞到我發哂熱....不過當然好開心，就係咁就影左得我地有嘅獨照~~（興奮）
不過原來湯湯唔記得左呢晚佢有野做，所以好趕咁食到2147湯湯埋單，影合照就散，不過佢都話唔好意思佢唔記得呢日有野做要咁趕，所以臨走前都講左好幾次話下次再食，就六月啦！
不論係點，已經覺得湯湯係好有誠意嘅，呢晚雖然見得唔耐，不過又係過得好開心吖！！
- Jul 14 Tue 2015 18:35
與Miss同好友年度聚會《Bespoke》
又到一年一度同Miss老友聚會，我地呢個組合已經好多年咯，唔會加多減少嘅！
之前約Miss時佢話可以離開沙田，因為我次次都揀新城市，諗住近Miss返屋企嘛，難得今次佢話可以跳出沙田喎，我當然唔放過機會，上網搵餐廳啱食之餘環境又要傾到偈嘅，之後我揀左３間比老友揀，最後老友就同我商量過後決定揀去九龍灣呢間《Bespoke》。
一來我地未去過，二來九龍灣商業區比較靜冇咁多人，Miss都贊成喇 (其實Miss都冇所謂嘅，我地話去邊就去邊) 。
呢日約好1330係九龍灣地鐵站等，點知老友遲到，到1350先行過去，不過都好近啫，14點05就到啦。
問左Miss想食乜後，我地就出去買野，呢間Cafe冇加一收費，不過就要自己去買餐先，再返埋位等食喇，難得出城，今次我請啦！
整體食物飲品都算ＯＫ，環境就算人多都唔會嘈，可能Ｄ客人都想靜靜的呢，我地食哂野坐左２個鐘都冇叫我地走，態度幾好，都可以再來吖！！
之後我地行過去零碳天地行下影下合照先返上德福送Miss搭地鐵啦，每次見完Miss都覺得好開心嘅 ：）
- Jul 07 Tue 2015 17:51
試返Ｄ舊野@Hopewell Centre Starbucks
成日都係去完中環Starbucks行落灣仔，從低處望上１樓嘅合和Starbucks，好多次已經想上去睇下，不過次次就係經過冇轉彎上去，今次唔同喇，因為下面開左間無印麵包店，所以都可以順道行埋喎，比個機會來呢間Starbucks hea下啦！
呢期我地決定只揀食舊野食，唔試新嘅，不過其實有幾款舊野我地都未食過 : >
三文魚忌廉芝士三文治 (半份 $24)
去到只見到半份，感覺唔係好抵食，不過都想試下；
餡料有三文魚、忌廉芝士、刁草和羅馬菜酸瓜等；麥包的質地比較乾，三文魚尚算新鮮，但又唔似煙三文魚？配上忌廉芝士唔錯，不過忌廉芝士味太重，食唔到其他材料的味道咯，只可說配搭健康有營，但整體一般。
