上年《米芝蓮》首次推出街頭小食店推介，其實係咪米芝蓮，我地好多時路經見到狗仔粉點解咁多人食，上網查下見到係懷舊野，都想試下，就係呢晚我地去睇戲前試吓吧！
店鋪開係唐樓底層角位，環境簡陋，只可放幾張摺枱，位與位之間更好親蜜添，不過要食呢類街坊食物，都唔會介懷地點環境喇。
我地睇睇menu，除狗仔粉更有火鴨翅，同幾款小食，睇落價錢都正常唔貴，就叫幾款試下一齊食喇。
① 狗仔粉 (細 $20)
② 招牌火鴨翅 (細 $20)
③ 雙拼：五香豬肚、鮮甜蘿白-小辣 ($13)
Total = $53
其實份量唔會話好多，不過整體係幾足料，味道不錯，係略嫌狗仔粉質感唔係咁啱食，係佐敦埋單咁嘅價，２個人食完半飽都算係咁咯。
狗仔粉：短短的狗仔粉，原來質感係粉粉實實煙韌的，好奇怪的質感，杰撻撻，我就麻麻喇；湯底因為加左少少豬油所以油油的，不過湯味都幾濃，算唔錯；最好食其實係枱上任食的辣菜甫，一定要加埋一齊食，脆脆的夠辣超正！
招牌火鴨翅：上到枱睇落都係普通啫，點知原來都有驚喜，鴨肉絲木耳絲非常足料，湯底夠味唔會過咸，好食！！
五香豬肚：小辣都唔算辣，辣汁較杰；薄薄的豬肚好腍冇臊味，好食。
鮮甜蘿白：非常清甜冇渣夠淋，好！
- - - - - - - - - - - - - - - - - - - -
十八座狗仔粉
地 址：佐敦寧波街27A地下
營業時間：星期一至日: 12:30-03:00
全站熱搜
留言列表
