其實呢間＜茶木＞係我12年去旺角瓊華笑笑時見到已經幾想去，不過睇當時的Menu，食Dinner又好似冇野啱我食，Tea Time去又怕齋食甜品好齋，咁當時又冇朋友對呢到有興趣咯，所以一直都冇去一試囉。
直到13年９月尾係尖咀加拿芬廣場開第３分店，咁啱之前同老友去完台灣食過雪糕磚塊，朋友好鍾意食喎，咁尖咀咁近我地幾個，一於去睇戲前食返餐，回味一下台灣之旅吖。
呢晚我地1930上到去都頗多人，等到1940開始入座，Menu設計用上而家好興用的雜誌形式，照片排版都幾好，睇得舒服真是好緊要。
雖然餐牌上的食品唔算有好多選擇，但因為有晚市套餐，我地幾個知慳識儉的計吓怎樣點餐最好，這樣都足以令我們揀了10分鐘才點好以下菜式大家Share食：
Dinner Set ①②③ + A/B (白飯、飲品及沙律一份($30))
① 沙茶牛小排 ($56) + A (白飯、綜合水果茶(+$11)、沙律) $56 + $30 + $11=$97
② 古早味三杯雞 ($56) + A (白飯、柚子冰、沙律) $56 + $30=$86
③ 台南肉躁扒時菜 ($52) + B (白飯、黑糖姜母茶、芒果奶油蛋糕) $56 + $30=$86
④ 香草大蝦沙律($56)
⑤ 紅油抄手($48)
⑥ 土豆絲炸蝦卷($48)
⑦ 巧克力香草蜜糖磚塊 ($68)
10% Service Charge Total = $538
我的主菜＜香草大蝦沙律($56)沙律汁另上＞
這個以一人份量都算足夠，我係幾偏愛汁醋嘅味道，我就好鍾意啦，朋友就麻麻喎；有六隻中等Size蝦，有蝦味唔會覺得係好雪藏，菜好嫩綠新鮮，仲有少少脆麵包粒，正。
＜綜合水果茶、黑糖姜母茶、柚子冰＞
呢三款飲品同時上 ，最正係綜合水果茶，料多味道唔甜更有少少酸好開胃，不過老友就怕酸覺得台灣好飲Ｄ；第２好飲係黑糖姜母茶，好濃姜味黑糖唔會好甜，好飲；最唔惦係柚子冰，只有少少柚子皮係底，成杯水+大堆冰，好唔得。
(餐)＜沙律＞ 其實算是迷你版凱撒沙律，份量少少都新鮮嘅，跟餐來講都冇要求的啦。
(餐)＜台南肉燥扒時菜＞ 肉燥少咸，放在新鮮菜芯之上，個汁幾好味，看似肉燥份量少，不過有肥肉同油份，所以其實係啱啱好，再多Ｄ都會食唔哂，見朋友係撈飯一流！！
(餐)＜古早味三杯雞＞ 用了白色瓷器小爐盛來，爐底有小爉燭，雖然瓷器厚，但都有少少作用嘅，起碼唔會食食下凍了，有微溫都好。雞件切成小塊口感唔算滑都唔實嘅，味道尚可，反而炸過再伴炒的蒜頭好入味好好食，蒜頭份量超多。
(餐)＜沙茶牛小排＞ 其實牛小排即係咩呢？上到枱上的睇落更似小牛仔骨，只是容詞不同吧？一大隻碟只有數塊，骨多肉少又多油，味道麻麻。
＜紅油抄手($48)＞ 一舊有８隻餃，辣油唔多辣，皮都幾薄幾滑，塞滿肉餡味都ＯＫ。
＜土豆絲炸蝦卷($48)＞ 共有５隻小小炸蝦卷，用土豆絲卷起的蝦肉炸後睇落唔夠土豆絲，蝦肉一般冇乜特別，睇Size都覺得幾貴添。
(餐)＜芒果奶油蛋糕＞ 跟餐+$18就食到，呢個價錢其實係抵食夾大件，可惜佢雪得太耐質感太實，實到已經食唔到係乜野味，蛋榚唔CREAM，口感怪怪，最好食反而係面層的餅乾碎。
＜巧克力香草蜜糖磚塊 ($68)＞ 全晚竟然最好味係呢個又靚仔，Vanilla雪糕唔甜，又有細細粒綿花糖同新鮮士多啤利夾住多士食正，裡面切舊的厚多士沾上蜜糖烤過脆口又唔過甜，而外面麵包身牛油味重，只是略嫌唔夠脆身而已，雖然比起台灣食果個弱Ｄ，但我地幾個都好滿意啦，份量的確好大，４個人真係剛剛好。
下次來其實主供食共有４款的"磚塊吐司"已經夠咯。
茶木‧台式休閒餐廳 TeaWood：http://www.teawood.hk/
文章標籤
全站熱搜
留言列表
