記得係農曆年時係尖咀行過去旺角途中見到有間店裝修緊，當時已經見到門面以湖水綠為主，感覺好Cafe幾西餐添，之後隔左一個多月再行經此地見到係一間米線店，我都呆一呆，吓！？
完全唔似食米線喎，除左因為門面似Cafe外，周圍已經咁多間食米線嘅店，係呢到又開一間，係外面見到餐牌又唔係特別貴，以呢區鋪租唻講，捱到嗎！？
隔左幾個月再行經，咿~~ 呢間野仲捱喎，相信食物應該都唔差啩？
咁啱又係店外更見到有我最愛嘅蕃茄湯底，即時好感興趣一試，適逢呢晚有戲睇，一於試下喇！
呢晚我地７點來到，已經差不多滿座，好彩我地早一步到，有枱坐，唔係就要坐吧枱，不過見到吧枱有USB充電座供叉電，太貼心了吧，仲要係面壁而座，早知就遲一步揀坐吧枱啦。播住純音樂，環境都幾唔錯，不過枱與枱之間都幾迫，空間感唔太夠。
Menu好簡單只有４版，不過都要睇清楚，因為有４款湯底加不同配料不同價錢，總之每種湯底都附一款配料，如果唔加配料就一個價喇，其實同其他米線店一樣。
呢晚我地２個人點左：-
① 涼拌青瓜 ($15)
② 香濃蕃茄米線 附一款$5配料蘿蔔 ($29) + 竹笙 ($7)
③ (餐) 特式小鍋麻辣米線(小辣) 附一款$5配料豆卜 ($28) + 黑木耳 ($7) + 檸檬柚子梳打 ($9)
Total= $95
(餐) 檸檬柚子梳打：唔大杯，得一片檸檬，不過有好多柚子條，可惜唔係好梳打。
涼拌青瓜：以薑同大蒜蘑成茸，雖然兩種都係辛辣，但味道竟然唔重，青瓜大件好清爽。
特式小鍋麻辣米線(小辣)：除左配料，附有大量芽菜、炸醬同酸菜，米線粉量足。雖然揀小辣，不過湯底帶麻，食落都唔算小，不過都幾好味；附大量芽菜更加清清口腔！始終食麻辣湯底跟豆卜最啱，吸哂Ｄ湯又唔覺油，正；小顆黑木耳，好滑。
香濃蕃茄米線：到我的蕃茄湯，附有大量茄茸、芽菜同韭菜，米線同樣粉量足，唔腍且煙韌，唔錯；蘿蔔夠腍冇渣；本以為只有兩三條竹笙，點知米線下仲有好多，被染成紅色，吸哂蕃茄味，好食！！
到個蕃茄湯底，有好多茄茸，唔會覺得酸，真係好濃郁又唔油，比起我係尖咀一間位於地庫出名的蕃茄通更好味。
- - - - - - - - - - - - - - - - - - - -
地 址：G/F, KiuKin Mansion, 566 Nathan Road, Yau Ma Tei
營業時間：Mon-Fri: 11:00-23:00
電 話：2363 8339
營業時間：Mon-Fri: 11:00-23:00
電 話：2363 8339
請先 登入 以發表留言。