一年每逢到呢個日子都係同時為２個朋友慶生，年年都唔知食乜，呢次就因為有晚經過呢到見到有間稻香，睇落去環境都幾唔錯喎，所以我就提議來打邊爐啦。
結果就真係來了，朋友先去等位，原來有分打邊爐同小菜的，咁兩邊都等啦，叫到邊到有位咪食咩囉，結果小菜位好快就有位喇，不過經過今次叫小菜，人手不足的情況下，上菜都幾慢，就算先點了的雞腳同粉皮竟然要等２０分鐘先有得食，好彩我地呢晚有大把時間，慢都冇所謂啫。
原來我地呢個組合係第一次係酒樓叫小菜食，往時都係打邊爐嘅，聽朋友講稻香各分店的質素都唔同，有Ｄ好難食喎，好彩今次我地呢個第一次都幾好食，仲幾抵食添，唔錯吖！
六人叫左以下食物：
① 沙薑雞腳
② 胡麻雞絲粉皮 ($32)
③ 鐵鍋瑞士醬油雞 (平日半價) ($34)
④ 脆皮咕嚕肉
⑤ 川香回鍋肉
⑥ 咖哩金菇肥牛煲
⑦ 海味雜菜煲
⑧ 濃湯松茸翡翠苗 ($68)
⑨ 老黃瓜燉排骨 (半價) x 5
⑩ 上湯波士頓龍蝦 伊麵底 (平日半價) x 3
⑪ 蟠桃壽包(半打)
Total = $849
沙薑雞腳：雞腳瘦瘦的，沙薑味略嫌不足。
胡麻雞絲粉皮：個胡麻牆都幾好，唔太多醬唔會食到成口汁，青瓜條爽脆。
鐵鍋瑞士醬油雞：鐵鍋熱辣辣聽到吱吱聲都覺好食，雞肉幾滑，但瑞士醬汁唔夠色，只尚算夠味。
脆皮咕嚕肉：外皮炸得脆脆又唔厚，肉質仍嫩腍，甜酸汁夠酸，菠蘿最好食！
川香回鍋肉：唔知什麼才是川香？只感油淋淋，蔬菜爽口嘅，不過又唔覺有Ｄ乜野川香味？
咖哩金菇肥牛煲：咖哩唔辣，金菇肥牛份量幾足，更估唔到會有芋絲添，芋絲加咖哩汁好食！
海味雜菜煲：都幾足料，有金菇、冬菇、西蘭花、白菜、花膠、秀珍菇，湯都好清甜微咸，不過粉絲好硬好奇怪！
濃湯松茸翡翠苗：個湯真係好濃郁且鮮甜，大量翡翠苗好爽好食；蟲草花木耳加芽菜同食一流。
老黃瓜燉排骨：終於等到湯來了，見店員用車仔排好一盅盅派，相信係一次過墩所以在座都等咁耐；湯好飲又唔油，淋淋的老黃瓜好食。
上湯波士頓龍蝦 伊麵底：呢個價錢來睇，龍蝦肉質就唔會點有要求喇，ＯＫ啦！上湯汁都幾咸，伊麵比較淋，夾都難夾，不過份量真係好多，冇要求要飽肚食佢就啱喇！
蟠桃壽包：熱辣辣嘅白蓮蓉餡好豐富，頗甜；包好軟經食。
- - - - - - - - - - - - - - - - - - - -
稻香 Tao Heung
地 址：尖沙咀緬甸臺3號恆星樓地下
電 話：8300 8084
營業時間：星期一至日:12:00-01:00
請先 登入 以發表留言。