成日都係去完中環Starbucks行落灣仔，從低處望上１樓嘅合和Starbucks，好多次已經想上去睇下，不過次次就係經過冇轉彎上去，今次唔同喇，因為下面開左間無印麵包店，所以都可以順道行埋喎，比個機會來呢間Starbucks hea下啦！
呢期我地決定只揀食舊野食，唔試新嘅，不過其實有幾款舊野我地都未食過 : >
三文魚忌廉芝士三文治 (半份 $24)
去到只見到半份，感覺唔係好抵食，不過都想試下；
餡料有三文魚、忌廉芝士、刁草和羅馬菜酸瓜等；麥包的質地比較乾，三文魚尚算新鮮，但又唔似煙三文魚？配上忌廉芝士唔錯，不過忌廉芝士味太重，食唔到其他材料的味道咯，只可說配搭健康有營，但整體一般。
煙三文魚沙律 Smoked Salmon Salad ($30)
Size同樣與其他沙律一樣咁細，兜沙律醬已經占據沙律盒唔少位；沙律菜有生菜、少少火箭菜同幾粒車厘茄，都算新鮮；煙三文魚得２塊，Sizex唔算大啦，味道都ＯＫ，整體還可以吧！
烤茄子雜菜千層闊麵 Lasagna Roasted Vegetable ($45)
記得上年尾食過一次印象係失望嘅，今次比個機會再試下，且看看會唔會有唔同，結果呢....
的確比上次好多咯，起碼唔再係過份扁，今次比上次正常喇，起碼睇得出食得到咁多層，包括麵皮、菠菜、茄子、三色椒同蘑菇，面層嘅水牛芝士烘得微燶，菠菜份量足，今次合格喇！！
蘋果金寶鬆餅 Apple Crumble ($18)
其實除左食到頂部外層金寶粒係幾香脆外，其餘整個鬆餅我都係食唔到蘋果味，只覺食緊一舊牛油鬆餅，仲要係冇乜味嘅....極之失望。
期間限定生日蛋糕星冰樂 Birthday Cake Frappuccino blended beverage ($41)
嘩！只可說甜甜甜，鍾意甜的一定鍾意，但我就真係怕了！
呢杯星冰樂除左有雲呢拿同榛子味外，更有好濃郁的野苺忌廉，其實似一杯奶昔，真係幾膩下。
星巴克咖啡 Starbucks Coffee
地 址：灣仔皇后大道東183號合和中心3樓318-319號
請先 登入 以發表留言。