我係一個超愛抹茶味嘅人，即係就算我唔鍾意食甜味，明知抹茶多數都係會偏向甜品果邊，我都想試試試下...甜就甜啦，只想食到不同抹茶嘅產品，所以呢，本來之前得知荷里活廣場開左間抹茶館已經好想去，不過果個商場真係冇野好行喎，搞到冇動力去囉，於是上年係新城市廣場開左分店，終於可以搵晚去試下啦。
過往行經呢間店都有大量人等位，講真的，真係唔使旨意要我等位，好彩呢晚佢收工去左攞位，仲坐係裡面等左我半個鐘，我先收工入到去，可幸的是當時顧客未算太多，佢又叫左杯飲品等我，所以未至於有人比面色佢睇，因為我們坐的位置係正大門口呢。
好了，當我坐下好快就揀到要乜，先點主食後再點甜品，以下就係我地點的：
① 抹茶沙冰 Maccha Smoothie ($49)
② 香蔥蜆肉拉麵 Clam & Scallion Ramen ($59)
③ 海鮮豬肉泡菜丼 Fried Pork & Seafood With Kimchi Rice Bowl ($79)
④ 抹茶軟雪糕最中 Maccha Soft Serve Ice Cream - filled wafers ($39)
⑤ 天突黑蜜抹茶葛粉條 Brown Sugar Syrup Maccha Kuzukiri ($29)
Total = $255
10% Service Charge Total = $275
其實，真係對呢間名為抹茶館幾失望，更覺得點解次次都見到有咁多人食嘅？係Ｄ人對食冇所謂？還是人食我食的心態呢？
至於我.....也許我對之的期望太高，所以就應該冇下次喇。
抹茶沙冰：面層有厚厚的忌廉，底層係唔夠沙的抹茶，而且茶味很淡很淡很淡....都幾失望。
香蔥蜆肉拉麵：幼身拉麵麵質彈牙，唔錯；蜆肉雖然細隻但份量算多且鮮甜，幾好；湯底好清一Ｄ都唔油，只係酒味略嫌重手左。
海鮮豬肉泡菜丼：飯餐還附送一碗清湯，有少少白菜、紅蘿蔔及一小片煙肉，幾清甜。
切成條狀魷魚淋身唔韌味幾好，豬肉太肥肉少，泡菜唔多味都淡，整體一般喇。
抹茶軟雪糕最中：上枱之後同Menu中的係一樣噃，威化餅乾盛著抺茶雪糕、士多啤梨、紅豆蓉、日式丸子及柑。
威化餅乾好脆味淡；紅豆蓉有豐富紅豆味好甜；士多啤梨及柑都甜；抹茶雪糕唔甜帶甘苦味；日式丸子軟綿綿且一貫係冇味嘅；反而成個甜品最有抹茶苦味的係威化餅上面的抹茶粉喎！
天突黑蜜抹茶葛粉條：我諗叫親呢個甜品都係因可以自己用木槌將葛粉推出果下動作本玩而叫，我都係因為咁：）
由一舊糕推出變成條狀後，連同黑蜜一齊食，黑蜜超超甜，抹茶葛粉抹茶味重到帶微苦，都幾滑，ＯＫ啦。
兩個甜品均配一杯熱玄米茶，玄米味幾重也香，的確可以解膩！
抹茶館 Maccha House
地 址：沙田沙田正街18號新城市廣場第三期1樓A132A號舖
電 話：3974 5540
營業時間：Mon - Sun 1130 - 2230
請先 登入 以發表留言。