終來到汽車主題FIAT Caffe喇，早幾年前係銅鑼灣禮頓道開店時已經想去，但就係覺得太遠，所以遲遲都冇去試吓，直到貴租令銅鑼灣店結業，選址美麗華開旗艦店，地方更闊落(佔地五千呎)，食物款色更多添。
既然老友問我想去邊到食生日飯，諗諗吓想試食咁耐又係尖咀，一於唻呢間啦！
呢晚我地Book左７點準時到達，門口已見到一部閃令令的FIAT，全店以紅黑色調，配以意大利三色國旗作點綴，店內售賣各款Fiat精品，頭盔、T-shirt、手錶、cap帽、模型車，意大利調味料，亦有電視播放賽車片段。
我地坐係走廊位置，店員會送上水及２條麵包條，又時不時見到店員拎坐菜式行來行去，有時會用車送，但比較嘈喇；又見到有開放式廚房及水吧，其實我都幾鍾意睇到廚師炮製食物！
我倆商量食什麼後，最後揀了以下食品：﹣
① 莫加馬天尼 Mocha 500 Martini ($65)
② 檸香馬天尼 Limoncello Martini ($65)
③ 水牛芝士蕃茄香草沙律 Insalata Caprese ($88)
(tomato, mozzarella, basil, black pepper, ectra virgon olive oil)
④ 烤海鮮拼盤 Pesce Misto Alla Griglia ($288)
(Calamari, Prawn, scallop, fish fillet, salmon roe, mashed potato, garlic butter sauce)
⑤ 意大利煙肉芝士粟米脆片 Chips Di Mais ($88)
(mozzarella cheese, bacon, corn chips, onion, pickles, guacamole, sour cream)
Total = $594
10% Service Charge Total = $653
附送麵包條：少少咸兼好脆，正！！
① 莫加馬天尼：本身鍾意愛爾蘭咖啡，想試新野，所以點左呢杯以Espresso, Vodka and Cacao Liquor製作的莫加馬天尼，細細杯酒味濃帶點Espresso味，更加添２粒咖啡豆係面，呢杯好得我心呀！！
② 檸香馬天尼：朋友點的係以Vodka, Limoncello, Lemon, Syrup調配的，反而酒味冇咁濃，都有少少檸香，都ＯＫ嘅。
③ 水牛芝士蕃茄香草沙律：一見到呢碟沙律，我地都即時表現失望，可能我地同樣預期呢個係一兜沙律菜吧，原來主要係以蕃茄，水牛芝士，羅勒，配黑胡椒和橄欖油調味，蕃茄及水牛芝士係好新鮮，可是水牛芝士冇味，黑胡椒又唔夠.....真係有Ｄ失望。
④ 烤海鮮拼盤：呢個係老友點嘅，以我咁慳家見到咁嘅價錢一定唔會叫啦！
不過一上枱見到咁豐富又覺得價錢算係值噃，材料有墨魚，蝦，扇貝，虎蝦、三文魚魚子，煎魚柳下有薯蓉及沙律菜，配牛油蒜味汁；
大大隻虎蝦肉質一Ｄ都唔實，且彈牙有汁；墨魚比較味淡，但唔會煮得過熟，質感軟滑；煎扇貝表面香脆，裏面仍有少許生，質感好好；煎魚柳大大件，魚皮微脆，肉質好滑唔腥都幾肥美；薯蓉好滑，但味道較淡，還可以喇；碟底有少少沙律菜，好新鮮的，整體都極之唔錯吖！！
⑤ 意大利煙肉芝士粟米脆片：２種顏色粟米脆片味道都一樣且好淡又唔多脆，(又有)水牛芝士，質感比較煙韌且味淡，我地都對呢款芝士麻麻地；煙肉粒少得可憐又唔香脆；配只有少少份量且冇乜味的牛油果sour cream感覺更麻麻，即刻覺得Caffe HABITU好食得多！！
FIAT Cafe
地 址：尖沙咀彌敦道132號美麗華商場B1樓B1018及B1023號舖
電 話：2808 4777
營業時間：星期一至日 上午11時30分至晚上11時
請先 登入 以發表留言。