我地恭蕃聚會真係好耐未試過，有時約到３個以上都有時間一聚已經有Ｄ難，今日我地有５個出來食餐飯真係算唔錯喇。
唔知食乜又想大家回家都方便，還是選擇旺角好，諗下諗下試下去一躺沙爹王吧，我又未去過當然贊成啦。
呢晚我地7點半去到，上到去地方枱與枱之間都有點迫，仲已經好多人添，好彩友人早一步去到攞位，如果唔係一定要等位喇。
入到去已經食住等，其實每碟份量都好細，所以我地都叫左３輪先食飽埋單，好唔好食就真係見人見智，對我來講就真是一般喇，真係志在同朋友聚聚。
呢晚２小時共點了以下食品：
① 自養肥大避風塘軟殼蟹 (標準$61)
② 蒜蓉牛油雞翼 (四隻$36)
③ 脆蝦棒 ($29)
④ 椒鹽脆豆腐 (四件$29)
⑤ XO醬炒蘿蔔糕 ($48)
⑥ 雜錦菠蘿炒飯 ($52)
⑦ 煙肉菠蘿茄醬酥皮薄餅 ($32)
⑧ 奶油津白 ($35)
⑨ 上湯時菜-小棠菜 ($32)
⑩ 水手酥皮薄餅 ($30)
⑪ 蒜香脆包 (4件$22) 配沙爹醬
⑫ 熱即磨咖啡 ($23)
⑬ 杏仁鮮奶珍珠 ($22)
⑭ 抹茶鮮奶珍珠 ($28) x2
⑮ 鮮芒椰汁仙草 ($34)
Total = $541
① 自養肥大避風塘軟殼蟹：賣相一般，算香脆又太油，有些少椒鹽味，味道算不錯。
② 蒜蓉牛油雞翼：外皮炸得香脆、乾、唔油， 都算大隻，肉都滑，雞油加上牛油當然好食。
③ 脆蝦棒：外面算炸得脆，但裡面粒粒蝦肉很細，唔覺係蝦肉，麻麻地。
④ 椒鹽脆豆腐：一客有４件，內嫩滑冇豆腐味，外皮只有微微脆，一般。
⑤ XO醬炒蘿蔔糕：用自家製XO醬炒切粒蘿蔔糕，個醬都幾惹味，蝦米足又不太辣；蘿蔔糕炒得乾身，唔太油，幾香口！
⑥ 雜錦菠蘿炒飯：炒得算乾身，有蛋絲、青豆、腰果、 肉絲及粟米粒，不過所有材料都很少，味道正路。
⑦ 煙肉菠蘿茄醬酥皮薄餅：呢個只有手掌大小的尺寸，味道就怪怪的，餅底用酥皮更加.......只可說果真唔好在非食Pizza的地方叫Pizza。
⑧ 奶油津白：即灼黃芽白，有薄切臘腸係令成碟菜有鹹香，但也令菜油淋淋，奶油味都唔覺有。
⑨ 上湯小棠菜：幾新鮮，上湯清甜，終於唔油。
⑩ 水手酥皮薄餅：用鮮茄芝士焗，都係果句，酥皮令批油油的.....。
⑪ 蒜香脆包配沙爹醬：沙爹醬當然夠惹味，但蒜香脆包已夠脆夠味，齋食已經夠。
⑫ 熱即磨咖啡：我知我係唔應該係呢種地方叫即磨咖啡.....好難飲。
⑬ 杏仁鮮奶珍珠：朋友話杏仁味幾濃，唔錯。
⑭ 抹茶鮮奶珍珠：只有淡淡抹茶味。
⑮ 鮮芒椰汁仙草：唔多似係鮮芒果汁，椰奶都好少，涼粉味ＯＫ，但份量都幾少。
請先 登入 以發表留言。