其實我倆係好少出街食飯，如無必要的，我都只會選擇去Starbucks，一來我只愛Coffe，二來對食乜都特別興趣，所以通常都係生日先會揀間正野食。
來到我倆的周年飯，都諗左幾間不同菜式的店，呢間Wired cafe我係上年食過一次覺得幾好，佢未試過嘛，就不如試下啦，其實佢只要見我會食就邊到都去架喇~~哈哈！
呢晚我地都冇Book位，1930 來到攞位，都有人等緊，職員話約半小時後喎，我就最憎等架喇，如果唔係佢話：「半小時都好快啫，周圍行下，有位職員會打比我地，等一陣喇好冇？」
好~ 因為冇第２間想食，咁我就即管行住商場等啦。
結果又真係８點打比佢話有位喇，我地快快步返去坐低揀野食咯，第一樣唔使諗嘅當然要杯 Irish coffee 囉~ 因為上次飲過好味，雖然Menu係冇呢杯野..呵！其餘的就交哂比佢發版喇。
呢晚我地２人點了以下野食，10分鐘後陸續上枱：
① 愛爾蘭咖啡 Irish coffee ($??)
② Umelini ($68)
③ 輕便早餐 Light Breakfast ($78)
④ 咖哩蛋包飯伴炸雞 Tokyo-style Curry Rice Omelet ($88)
⑤ 焗墨西哥粟米片 Salsa Nachos ($55)
我就覺得食飯一定要「慢食」嘅，最怕食快餐，尤其去有加一收費嘅地方，就更加要慢食，享受食物與環境，今次同佢來，我地都覺得滿意嘅。
① 我最愛的＜愛爾蘭咖啡＞，雖然與我飲開的份量較細杯，但勝在面層的cream也較少，酒味重Ｄ，啡味較淡，同樣覺得呢間調配的更適合我！！
② 佢＜Umelini＞由梅酒，蘇打水、青檸汁和黑醋栗甜酒混合而成，佢就唔多鍾意呢杯野，覺得怪怪地，我試飲過係有汽嘅梅酒味飲品多，青檸味好微，就唔覺有Cassis味噃！？只可以話夠大杯囉，但唔抵飲。
③ ＜輕便早餐＞ 以呢個價錢有２條大腸、２片煙肉、一件大蕃茄、Omelet、沙律菜及麵包，比出面食的all day Breakfast便宜，雖然已說明是『輕便』，但份量都唔算輕便吧，係幾飽肚噃，各款味道正常，沒有特別差及好啦，不過件Omelet就幾滑，菜都好新鮮。
④ ＜咖哩蛋包飯伴炸雞＞金黃色滑蛋大大塊覆蓋著白飯，蛋真係好嫩滑有蛋汁；白飯唔硬配蛋同食好夾；雖然見到咖哩汁黑媽媽會覺是好辣的，但這是日式咖哩汁，即係唔辣咯，味道同盒裝咖哩汁磚真係一模一樣，係好味嘅；炸雞看下去似像好厚粉，咬一口又唔係喎，炸雞都算整得嫩滑，算不錯的喇。
⑤ ＜焗墨西哥粟米片＞份量同上次食的一樣咁大，粟米片焗得好香脆，唔同其他地方食的咁油，半溶的車打芝士加上Salsa醬同黃瓜醬夾住粟米片好惹味，淨配酸忌廉都好食。
Wired cafe
地址：尖沙咀彌敦道118號Mira Mall地庫 B13號舖
請先 登入 以發表留言。