長到我咁大個女，今次都係第一年同爸爸媽咪慶祝佢地周年紀念飯，今次來呢到都係佢地揀嘅，記得上一次來已經係好幾年前的母親節喇。
雖然我同哥哥對潮州野都唔太好，我就更加冇乜野好食啦，不過難得(真係好少)一家落街食飯，佢地想食乜都去的啦！！
因為不嬲都知呢間野係冇得Book位又成日都Full哂驚有排等，所以呢晚我一收工即刻去搵位喇。
去到係要自己搵位嘅，Ｄ職員係唔會理你，就算你同佢講話要４位，佢都會叫你自己搵下，最後都係由老闆帶我地入房坐咋。
我地搵到位後，爸爸都係7點3來到喇，好快已經叫好餸添。
上菜速度都極之快，只係最後的炒蜆等得較耐啫，其實以我地食過呢頭的食店，「生昌」已經算係呢邊貴得來份量也算是合理的了，因為好多間嘅味道都只係一般，有Ｄ更是難食的呢.....
雖然我唔喜潮州菜，不過又的確ＯＫ嘅，比起早年食過果次好左添，爸爸媽咪更感滿意啦！！
最緊要佢地將來日子更恩愛快樂！！
呢晚我地一家人點了以下野食：
① 鹽焗烏頭 (大 $118)
② 獅頭鵝肉 (中 $95)
③ 潮州煎蠔餅 (中 $88)
④ 馳名沙茶牛肉介蘭 ($88)
⑤ 金不換炒蜆 ($88)
⑥ 一碗白飯 ($10)
Total：$487
① 鹽焗烏頭：魚油極豐富，肉質鮮嫩好滑，豆醬唔太咸好味，本身對烏頭麻麻又怕腥的，都覺讚！
② 獅頭鵝肉：鹵水汁唔太咸，撈飯好；鵝都好入味，半隻唔太大，不過就好肥，皮脂肪與肉比例起碼有 4:1，鍾意肥就好囉，我地就覺得一般喇！
③ 潮州煎蠔餅：真係估唔到會有咁大塊，睇落以為有好多粉漿炸，不過裡面有好多隻蠔，咬落去熱辣辣脆口，蠔唔腥，爸爸好愛呢個！
④ 馳名沙茶牛肉芥蘭：未試過沙茶醬，以為似沙嗲醬，不來唔係，唔甜有蝦味偏咸仲有少少花生粒，味道ＯＫ；芥蘭好爽嫰，牛肉片也炒得嫰滑，屋企不嬲都少有食牛肉的，呢個真係唔錯。
⑤ 金不換炒蜆：真係幾大碟，雖然汁也漸了大量，但蜆都有好多，大大隻新鮮的，起碼碟裡冇死蜆；芡汁味濃郁，有少少金不換葉、青紅椒也炒得剛好爽身，正！
地址：沙田大圍下徑口村151號地下(田心警署對面)
請先 登入 以發表留言。