旺角人來人往，Starbucks應該早就開多 1~2間分店啦，因為位於洗衣街漸２層的分店，好早就會被學生霸佔哂Ｄ位，真係睇見Ｄ學生放哂Ｄ書簿係枱又唔幫襯，又Ｄ更走左去唔知去邊好耐先返來，真係想掉哂Ｄ書！
Café 唔係歎嘅地方來架咩？要讀書好心去自修室啦！
呢日中午我又去到洗衣街Starbcuks，已經有好多人，差唔多大半客人都係學生添，行左２個圈先搵到位，坐低放低個袋即刻去買啡先，食物就諗住等埋男友先買囉，就係職員找錢比我時，比多張寫住『快來銀行中心星巴克分店，享受獨一無二的咖啡體驗』我，同我講銀行中心開左新分店，拎住呢張紙去買任何中杯裝或以上手調飲品，可享免費升級喎，每次Starbucks開分店都會咁做嘅，今次終於到旺角啦。
就係我買完坐埋位等男友時，佢話行緊過來，我咪叫佢不如上去銀行中心分店視察下多唔多人，唔多人我就過去搵佢....結果咪快步離開洗衣街囉~ 呵。
由開店至今已開業２個月，開放式格局幾舒適嘅，惜坐位真係唔算好多，一大張長梳化前有一張張小圓枱，其實坐埋去都幾迫，不過近店外都有幾張矮枱，啱２人唔搭枱人士喇。
呢日我地就揀２人座，雖然張枱過矮，但都好過坐入去迫吧。暫時銀行中心分店好處係未算有太多人，相比其他分店算是靜的了，希望能維持Café一貫舒適環境啦。
草莓士干餅 Strawberry Scone ($17)
呢個係上年夏天推出嘅，今年夏天又翻出來仲貴左$1。
表面鋪滿粒粒亞麻籽、裡面有粒粒草莓乾，叫職員翻烤耐Ｄ，表面金黃致餅邊鬆化，正！
裡面質感鬆鬆軟軟，味道唔會好甜，餅心有Ｄ濕潤唔乾，加埋草莓果乾少少酸唔會膩，都幾好食更食得飽添。
榛子杏仁丹麥酥 Hazelnut Claw ($19)
本身覺得丹麥酥熱食會好食Ｄ，所以先叫職員幫我翻烤熱Ｄ燶Ｄ，果然熱左係香Ｄ嘅，表面又酥脆了不少呢。
裡面雖然見到一層層酥皮，不過都唔覺鬆脆，仲覺得有點實嘅......
見佢形狀成隻咁，中間有榛子醬，唔甜嘅，不過都唔榛子味啫，只得係果仁醬喇，表面有香脆的杏仁片增加口感，若可多加Ｄ杏仁片就更好啦。
肉醬雙層芝士千層闊麵 Double Cheese Lasagna ($55)
翻烤完出來熱辣辣，面層微燶的芝士好香，裡面以白汁居多，闊麵都幾煙韌，如果一個人食就真的太膩，肉醬唔鞋口也不錯嘅。
請先 登入 以發表留言。