記得有次係中環行過去灣仔睇玩具時，咁啱經過修頓球場後面，大門正正位於大廈角落頭，店外有張小枱，一眼望入去好多人，見到好多麵包甜品，就係咁令我一直想去試試喇。
呢晚我同佢收工來到已經1950，好多人，好不容易才坐在高枱上，店裏的麵包位、沙律吧、甜點櫃及開放式廚房都佔了大部份空間，以致店內坐位不多，大多都係要搭枱位，只有3張２人枱而已，想撐枱腳嘅就唔使旨意啦。
可幸的是雖然人多，但顧客說話聲浪不大，唔會覺好嘈。
食物方面，這裏是以酥皮、麵包及甜品為主打嘅Café，也提供幾款簡單輕食如沙律、三文治、意粉及pizza。
坐在高木枱上可清楚睇到櫥窗內的沙律大概有５~６款，分兩種size發售，大Size $60，可選4款口味共400g的沙律；細 Size $42，可選３款口味共250g的沙律。
呢到與普通Cafe一樣自己搵位自己買野，不設服務及加一，買完野，在旁邊有一小撮地方擺放刀㕚、紙巾，調味粉任君取用。
其實呢到食物選擇之多真係食多次都試唔哂，尤其係麵包同甜品添，味道方面都幾ＯＫ吖，Pizza更即叫可以睇住佢即製，熱辣辣好食。
我地叫左幾款野食，計埋等佢即製的Pizza，我地都只是食了１個多小時而已，就係因為店內裝璜格局應是想營造寫意空間讓客人悠閒地品嚐甜品麵包的，但座位太少又太迫，一點都唔覺寫意放鬆，除非人少Ｄ，咁都可以再來食。
或者可去係６月仲係尖沙咀分設的分店，從外面望入去的環境好似寬闊一點。
另有一樣睇到，店內是全女班喎，沒有男職員嘅，唔知點解呢？
食到最後，雖然個Cupcake一般，不過Overall 呢餐係幾好嘅，或者下次試下佢其他Cake同熱食吧！
呢晚我地２人揀了：
① illy Coffee ($32 x 2)
② Large Salad Box (400g, $60)
③ "Passion." Sour Dough Pizza (Antipasti & Mushroom) ($72)
④ Green Tea only on Chocolate Cake ($30)
Total = $226
＜illy Coffee＞ ($32)
今次我地只揀選普通咖啡，細細杯，份量就似飲Double Espresso一樣，味道極濃好香偏苦唔酸，好飲。咖啡旁邊還有一片意大利餅Biscotti，餅裡有開心果及杏仁，少甜而薄脆，用來伴著少苦的咖啡確係正。
＜Large Salad Box＞ (400g, $60)
買完沙律後走到沙律櫥窗前，見職員都戴上手套的，同職員講你要那幾款沙律，佢便會用一隻大碟將揀選的沙律按份量再電子磅上量重，唔知點解我見我地果碟比較少，自己用手秤一秤感覺都唔似有400g嘅？因為見坐的對面的與我揀選的差唔多，但大碟得多噃！？
Anyway, 唔理太多喇，最緊要好食，睇落顏色豐富，雖然賣相麻麻似碟頭飯咁，不過呢個分量２個人食都ok夠嘅！
依中間順時針起：
Moroccan Couscous — 先試外面少有的藜麥Salad，以橄欖油和檸檬醬調和，有提子乾、鷹嘴豆等，其實冇乜味，而且橄欖油比較多，剩係覺得一口油啫，不過藜麥都幾好咬，一試無妨。
Bounty of eden — 西蘭花, 椰菜花、紅蘿蔔粒、露荀及車里茄，以香草炒仍爽脆新鮮幾開胃，不過感油膩了點。
Tomato & Mozzarella — 呢款用了欖油香草，大大件蕃茄鮮甜清新，有水牛芝士粒粒，可惜只有數粒，好快食完，呢個終於唔覺膩。
Californian Shell Pasta — 由大量勁Creamy的香草沙律醬混和貝殼粉和雞肉甘荀，我對大量嘅沙律醬麻麻，友人就覺得 OK。
＜"Passion." Sour Dough Pizza (Antipasti & Mushroom) ＞ ($72)
今次應是我第一次食Sour Dough Pizza，切成６件放在大木碟上，本身我唔太鍾意食Pizza，通常我只會食批邊香脆部份，中間餡料會比其他人食架。
所以我對批底嘅期望較大，呢個真係睇住佢出焗即時放係我地面前，香氣濃郁，中間放上一堆火箭菜，每件也有大大塊蘑菇，睇樣係滿分嘅。
批邊香脆又鬆軟，好食喎！火箭菜帶有辛辣及蒜的香，極新鮮。薄餅上的法式醬料味道唔錯，食完唔會膩，芝士味香，呢個真係好味又抵食喎！
<Green Tea only on Chocolate Cake > ($30)
呢個甜品係食哂主菜後加的，因為甜點櫃實在有太多選擇，今次我地就揀最喜歡的味道入手：綠茶，睇見綠茶只有呢款，就係佢啦。
睇佢細細杯幾靚仔，頂層的一塊黑朱古力上有Cream...Mousses?
中間一層厚厚Mousses好幼滑，可惜綠茶Mousses的味好淡，只靠面層綠茶粉才有味....有點失望。
用叉深入一點才食到朱古力蛋糕，蛋糕好濕潤但朱古力味淡、普通喇。
Passion by Gerard Dubois
地址：灣仔莊士敦道74至80號輝盛閣國際公寓地下1號舖
Tel: 2529 1311
請先 登入 以發表留言。