大大話話我係呢間公司都做咗１３年，來到第１４個年頭，繼上年老闆突破地揀左去食西餐做團年飯後，今年再次唔揀去酒家做年，去左隔離街嘅＜阿鴻小吃＞，原來好多同事都唔知呢間係米豬蓮食店，好多人都嫌棄佢，不過又係嘅，話哂都叫做"團年飯"，去一間叫做"小吃"嘅地方食，唔識嘅難免會有微言。更何況原來同事們都比較傳統，覺得團年飯應該要去酒家食中菜呢~~ 可能因為有得收早去打牌，食飯時又可以玩啤牌啦。
我就冇所謂，唔揀中菜我就更更更開心添，因為我都唔鍾意食中菜嘅，所以上年老闆揀去食西餐我都不知幾開心！！
呢晚我地６３０收工，慢慢行到過去都只係幾分鐘路程，記得呢間開鋪時，佢地果Ｄ咭片、邀請咭都係我地印嘅，但都係第一次入去，原來都幾大，行到最入，原來有房喎，初時我還怕會好嘈添，好彩有房，裡面剛好可放２圍，可惜嘅係一方係大圓枱，另一邊係長枱囉，我當然揀大圓枱啦，食野夾餸傾偈都方便Ｄ嘛。
入到場，等齊人前當然係開紅酒飲，老闆提供嘅果然係好飲嘅，我都唔知飲左幾多喇..哈哈哈！
有高層同老闆打招呼兼招呼我地喎，好似好熟咁，各職員都好有禮，地方清潔都很唔錯，坐得好舒服。
等下等下，於 1855 餸菜開始陸續上枱，今餐菜單如下：
① 例湯：木瓜唐排
② 六小碟﹣鹵水鵝腎 ($58)、鹵水豬頸肉 ($68)、素鵝 ($58)、鹵水墨魚 ($58)、芥末雞腳筋 ($68)、涼伴爽耳絲 ($68)
③ 鹵水雙拼 ($158)
④ 炸紫菜墨魚卷
⑤ 西芹炒帶子
⑥ 鹵水豆腐 ($35)
⑦ 南乳炆齋 ($55)
⑧ 蒸魚
⑨ 阿鴻招牌撈麵 ($60)⑩ 鮑片炆鵝掌
⑪ 阿鴻炒飯 ($68)
⑫ 甜品２款：芋泥酥、煎堆
慢慢食又慢慢飲，食下傾下都搞到９點，雖則我對鹵水、中菜麻麻，不過呢餐都唔錯，雖然各碟份量唔大，又知道價錢都頗貴，但是環境及服務都幾好，味道唔錯之餘，始終食唔舒服都很重要的嘛，呢晚都過得幾開心吖，若然坐係隔離果圍可以近Ｄ同樣係圓枱就更好lu..！！
六小碟：
鹵水鵝腎﹣厚度適中，好入味又唔韌唔膩，正！
鹵水豬頸肉﹣同其他產品一樣好入味，也唔會太肥。
素鵝﹣有好很多層，豆皮吸飽了滷水汁，其實真係好彩滷水汁好味，但是太吸汁了，有Ｄ膩。
鹵水墨魚﹣唔韌彈牙，但唔入味，一般。
芥末雞腳筋﹣好少食到雞腳筋，呢個係雞腳的後蹄部份，沒有骨頭，一口一啖，好爽口，口感幾好，又不會過辣，食完想再食，正！
涼伴爽耳絲﹣即係豬耳，口感幾好，有麻油香，ＯＫ啦。
木瓜唐排例湯﹣有一大窩，足夠兩圍分享有餘，本身我唔愛湯水，但都飲左一大碗，湯料豐富，有木瓜、淡菜、排骨等等，火候十足味道濃郁，有屋企煲嘅味道喎。
炸紫菜墨魚卷﹣炸得幾靚仔，唔油膩，墨魚尚彈牙，裡面夾住蛋、惹及紅蘿蔔，幾好食。
鹵水雙拼：鹵水鵝片(起片)鹵水鵝(斬件有骨)﹣鵝肉爽口彈牙又嫩滑，睇落好肥，食落剛好不肥不乾，脂肪比例ＯＫ，鵝皮甘香豐腴，配合味濃的鹵水食，幾好！
西芹茶樹菇炒帶子﹣唔知係咪老闆叫先有呢款產品出現，因為感到同呢間野好唔拉間咁！？
顧名思義材料有西芹、茶樹菇、心型紅蘿蔔及帶子，西芹爽口，茶樹菇有咬口、紅蘿蔔都係咁啦，帶子細粒厚身，冇乜味，可能玻璃汁杰了點，感覺油油地。
鹵水豆腐﹣豆腐個樣都幾靚仔幾厚，都幾嫩滑，各同事都一致讚好。
南乳炆齋﹣呢個家常菜係呢到幾都出名，好似個個食客都要點咁，材料有冬菇、津白、雲耳、粉絲、雪耳、支竹、豆卜、白果等等，南乳好惹味又唔會過咸，睇落好普通嘅一碟齋，但又真係幾好食。
蒸魚﹣仲唔係因為我地做團年飯先出現嘅？？雖然我食完都唔知係乜野魚，不過魚肉好嫩滑，汁都調得好味，估佢唔到喎。
阿鴻招牌撈麵﹣份量細碟且好貴的撈麵，材料有幼麵、銀芽、蝦米、蔥、芝麻，用XO醬炒，炒麵炒得乾身香口，有鑊氣嘅，都唔會得個辣字，不過唔明點解叫"招牌"？ＯＫ啦。
鮑片炆鵝掌﹣鵝掌滷到骨肉分離，有入口即化的口感，也唔會死咸，唔錯；薄薄的鮑片唔韌都係咁喇。
阿鴻炒飯﹣同炒麵一樣用招牌XO醬炒，材料有鵝肉粒、唐芹粒、菜粒、櫻花蝦和蛋，飯炒得很乾身唔油膩，鵝肉粒都幾豐富，加埋菜粒增爽口口感，幾好食吖！
甜品１﹣一個個佈滿芝麻的煎堆，一個個上碟都仲熱熱的，裡面係紅豆茸，不過都幾甜。
甜品２﹣呢個炸芋泥香脆唔油唔甜比較受歡迎喎，都算係一致讚好喇。
阿鴻小吃
地址：觀塘鴻圖道83號東瀛遊廣埸地下A舖
營業時間 : 每日 早上11:30 - 晚上10:30
電話: +852 3107 4111
電話: +852 3107 4111
www.hungsdelicacies.com/
請先 登入 以發表留言。