知道大圍有間Cafe都係因為有晚哥哥同我講佢有日Tea Time係大圍high Tea好舒服，問我有冇去過，那時我才知原來又有新cafe開咗。
之後一日我已經去視察吓，睇吓有乜啱飲啱食先敢去試架嘛，當經過去見到門面都幾靚，室外有沙發座位真係似酒館也帶有台灣色彩，在門前有個高架放了Menu，細看之下都有好多食物飲品選擇，不過夜晚食品選擇較少，但當我見到Menu有愛爾蘭咖啡，真係唔使多諗，一定要搵日來試下。
就在沒多久後，我就Book２位1930，我準時到達，當晚已經好多人進餐中，雖然多人但都幾靜，環境幾好，樓底好高，２樓有時會有Band表演添；裝潢都幾有特色，石屎灰色的牆身、木製檯椅，四周都見到不同的鐘，氣氛很好。
是晚我朋友在1945才到，諗好點餐後１５分鐘，食物飲品陸續來到，好快已經一枱都係更唔夠位放添，係我地叫得太多野食吖？還是張枱細呢？相信２樣都係啦..XD
我對呢晚食物方面感覺都算ＯＫ，唯獨因想飲愛爾蘭咖啡而來的我，呢晚店員竟然話今日冇呢款飲品，其他的都有喎...真係有點晴天霹靂.....點解咁架！？那只好揀另一款我較少飲嘅咖啡飲啦。
當我地埋單離開後，我地不約而同都覺得如果以食物地區來計嘅話呢到都算貴，如果要以同類「咖啡．酒館」來選擇，當然會去《牧羊少年咖啡．茶．酒館》，食物及飲品都抵食正Ｄ，不過如果要近嘅，呢間《古朴年代》的確係不二之選。
是晚我地點選了以下飲食：﹣
① 維也納咖啡 ($34)
② 薑餅朱古力 ($34) + 冰($3)
③ 炒野菌沙律伴油醋汁 ($60)
④ 西班牙墨汁魷魚圈 ($52）
⑤ 蘑菇雞薄餅 ($108)
⑥ 傳統意式肉醬千層麵 ($70)
Total: $361
率先上枱嘅係＜炒野菌沙律伴油醋汁＞，炒野菌份量都幾多，沙律菜又新鮮，仲有大量芝士粉，都幾好食，只是感覺油醋汁油份多咗Ｄ，口感油油的，好在醋味酸酸的減輕油膩感。
到我的＜維也納咖啡＞登場，面層有厚厚的Cream好滑，黑咖啡味濃微苦但唔香，再吸餟底層的糖，甜味帶起中層咖啡味，呢杯都唔錯。
朋友的＜薑餅朱古力＞，其實似沙冰又唔唔算咁？朱古力味濃，薑味淡淡的，大大杯質感而幼滑，ＯＫ。
喔~來到＜西班牙墨汁魷魚圈＞，真係黑媽媽喎，原來係炸嘅，炸粉唔算厚，魷魚圈唔韌帶點彈牙，可是唔覺有墨汁味，而且都幾油膩。
再到四四方方的＜蘑菇雞薄餅＞上枱，枱面已經放唔落我地２杯野，最鍾意係佢的批底非常薄，脆口，蘑菇份量尚可，雞肉偏少，但整塊都佈滿芝士唔膩係好味嘅，不過就偏貴喇！
最後才到長方形厚厚的＜傳統意式肉醬千層麵＞，一睇就覺得佢真係即叫即製，肉醬唔鞋焗得啱啱好，千層麵煙煙韌韌，芝士味反而冇乜，以呢個價錢份量同質數都合格吖。
• 沙田大圍積褔街72號金輝樓地下D鋪
Phone：2613 0544
請先 登入 以發表留言。