去《甜品工房》食生日甜品

等了又等，終於來到《甜品工房》喇！

當每次行經都見到門前一大堆人等位，就算想食，但睇見咁嘅情形都係走把啦，我就最憎等位架喇，要我比錢仲要等，真係寧願唔食。

呢晚我地食完Dinner好飽，見時間尚早，所以就行吓行吓，又唔想返屋企，便想到不如去食甜品咯，佢知我唔知甜品但知我唯獨愛「宇治金時」呢，知道呢間有所以提議吓，......起初我都諗咗陣，真係有排等喎...咁見係自己生日，好啦，等就等啦，真係好想食！！

位於厚福街的《甜品工房》，門面有大大個掛住黑底白字招牌、全落地玻璃看透店內、裝璜以摩登且簡潔，看得出甜品至內在都落過心思！

店面地方不大，門口靠左位置係外賣部，有蛋糕、馬卡龍等等；外賣部望入去係半開放式廚房；對住的用餐區擺放好多正正方方桌子及無背椅子，座位與座位好劑迫，唔多好坐，係食完要走果隻。

我地 2210來到等，也要等１５分鐘先入座，好彩早一步添，因為之後更多人等。

其實甜品款式唔算太多，分幾種，每種約有３~４款，不過我就當然唔使揀啦，一定係食「宇治金時」，而佢都要諗咗陣先決定要「紫醉之迷」，貪佢有提子冧酒雪糕喔。

佢的「紫醉之迷 The Joy of Party」$47

材料：提子冧酒雪糕／粟米片／椰果／巨峰脆珠／軟雪糕

先來的係「紫醉之迷」，自家製的冧酒提子雪糕軟滑，紫色的巨峰脆珠微甜少少酸咬落口感好得意他好味，粟米片都係咁上下，賣相係幾靚仔，但睇落價值$47嘅分量唔算好大，材料他不太多，都幾貴。

我的「宇治金時 Ujikintoki traditional japanese style dessert」$50
材料：宇治抹茶汁／自家製紅豆雪樽／日本紅豆／小丸子

最頂層有２塊自家製紅豆雪樽，充滿奶味但紅豆味冇乜；另半邊面層鋪滿豆豆紅豆夠煙韌少甜，淋上花奶就過甜了；小丸子都係煙韌冇味的喇，最可惜係抹茶味偏淡，真係太淡，而且刨冰好快溶，我已經食得算快，但未到一半已經開始飲冰水咁，以前係麻布茶房食都唔會咁嘅，總括來道，呢個味道同分量都算好，比食「紫醉之迷」抵一點點。