其實呢日都冇遊半天咁多，我仲係下午放工後先出發，去到碼頭已經２點半喇，30分鐘船程，要到1515先落船，諗諗下...上之去長洲係幾時呢？２年前好似入過去，不過就冇四圍行過咯。
未食Lunch，一入到長洲緊係搵食啦，知道有間食糕點出名的，就快快行入細街睇吓搵唔搵到先，行咗冇幾耐就見到有間叫「新照記」賣糕點，更有TVB周刊介紹過喎，即去買件紅豆糕同綠豆糕試吓先，o依~ 紅豆認真豐富，質感實Ｄ唔甜好食呀！
不過再行多十多步又有第２間「新照記茶餐小食店」賣糕點，仲有好多選擇好多人排隊添，莫非呢間先係出名果間？好~ 再買紅豆糕同綠豆糕啦，呢間質感係鬆軟Ｄ但位偏甜，雖然呢間多人買Ｄ，但我都係鍾意第１間，因為冇咁甜同質地實Ｄ，但朋友鍾意第２間咯。
之後係隔籬又買咗串咖哩魚旦，２大粒夾住１粒小($10串)，我食細粒的，冇魚味就一定架啦，個咖哩汁都幾好味~
之後我地一路行一路食糕點，其實今次主要入來都係想Hea吓同上小長城，因為來過幾次都冇去過，所以今次一定要上去望望啫。
先沿東灣路行至東灣，再經觀音灣泳灘方向行多１５分鐘就到小長城入口，一路行一路經過由麻石柱橫直交錯建成的圍欄，貌似長城，故被稱為「小長城」喇。
去到小長城入口，再行約20分鐘就到觀景處，上面有個亭稍停休息下，因為實在太太曬了.....，見尚有點時間，都可以行落去睇埋叮噹石、金鷹石、花瓶石等等，之後就返轉頭行返觀音灣泳灘→東堤路再轉返入去行返去新興海傍，返到出去已經４點９了，真係要搵食喇。
因為已經好晏，所以只係新興海傍搵食，見到有間「Rainbow Café」，埋去望吓個Menu，見到有墨西哥卷又有咖啡飲，都係唔好再揀喇，就食呢間啦。
因為要趕返出去睇戲，最後我地食完趕搭18:20普通渡輪($24.6)返出中環，其實可以搭遲一班坐高速船嘅，不過要$35.3喎，咁緊係揀$24.6的啦。
請先 登入 以發表留言。